Om bøker og musikk og slikt

Det er vel ei stund sidan eg har skrive noko her no, men eg har skrive mykje anna ja. I dag til dømes, skreiv eg dette diktet. Ein tanke stakk innom på morgonkviste, og bad meg notere følgjande:

Kvar vart det av leiken?                  Debussy - Arabesque II (1888)

Ein skulle

leike litt meir

ikkje berre

med ord

Tenkjer på

korleis eg leikte

med det lange

lyse håret ditt

No er du

borte for meg

Eg tek

mot til meg

leiker litt med nokre

uforgløymelege minner

Jammen

kunne vi leike

du og eg

hand i hand

sprang vi

på konglekledde stiar

kva kunne ikkje skje

bak ein skjeggete

furulegg

eg raudnar

berre ved tanken

Innerst inne

visste vi vel begge to

at det ikkje

kunne vare

men tankane ...

Elles har det gått svært mykje i korsang dei siste vekene. Namsos Kammerkor er nettopp ferdig med eit vellukka Prøysenprosjekt saman med Ketil Kolstad og dyktige musikarar. Det var knallmorro :-).

Det fekk meg til å reflektere litt:

Rikdom

Han sit på busssen. Er på veg heim frå den siste av forestillingane på helgeturnéen. Eg er rik, tenkjer han. Søkkrik.

Det er snart 9 år sidan sist han hadde ei slik kjensle.

Han kjenner han smiler inni seg. Eit stort varmt smil.

Damene syng "Visa hass Johan". Han må svelge nokre gonger. Der er så fin den songen. Damene òg forsåvidt.

Det er mange måtar å vere rik på, men det største av alt er å finne seg sjølv, i eit smil.

----

Det er så mykje meir eg skulle skrive, men det får vere til ein annan gong.

Til slutt vil eg kome med ei litteraturtilråding.

Guadalupe Nettel sin fantastiskek sjølvbiografiske oppvekstroman, er absolutt verdt å bruke tid på. Ein av dei beste bøkene eg har lese i år. Ho er ein av dei store stemmene i meksikansk samtidslitteratur. 

Alt godt frå nord :-)

Rune